D'Nixa vom Bada

S'Frauabad en Strempfelbach
Ja des isch a feine Sach
Do kommet se mitonder
Sogar vom Schurwald ronter
Dia fehlet bloß en dera Zeit
Wenns's Glatteis hot ond Hembeer geit.

Kleiheppacher, dia send au et doof
Dia fahret übern Kächeleshof
Voller Schneid und Temprament
Ond weils koine Weistädter send
Sait ihr Schultes ach wia schad
S'Korb gibts halt koi Frauabad.

Ond vo dr Weistadt drei
Send Großheppacher au drbei
Wenns mr gschafft hot, des isch klar
Isch's em Wasser wonderbar
Ens Frauabad ohne Brems
Fahret dia oft über d'Rems.

Au d'Endersbacher kommet gern
Ihr Bad, des isch jo so modern
Enna ond außa ganz famos
Ond bada ka mr hüllalos
Ob nackt, modern oder mineral
Des isch dene ganz egal.

Dia kommt bei jedem Wetter
Ja s'Strempfelbach sei's netter
S'Wasser warm und einwandfrei
Ond em Bad koi Ma drbei
Weil jedem, ob Weltmensch oder Christ
Dr Zutritt streng verbota isch.

Drom gibts em Frauabad nie Verdruß
Em neuna isch em Wasser Schluß
Dia oiine ganget hoim ens Bett
Wieder andere aber net
Dia sitzet froh ond frisch
Oba, hentrem Wirtschaftstisch.

Dort kommet dronter nei
Ab ond zua au Männer nei
Dr oi der macht a Schwätzle
Dr andr holt sei Schätzle
Ond freut sich voller hoffa
Se isch jo et versoffa.

Ja, des scheene Frauabada
Brengt dr Weistadt au koin Schada
Wieviel Zehnerkärtla wernd do zwickt
Wenn des dr Stadtrat überblickt
Wird er es begrüßa
Ond s'Frauabad nemme schließa.

von Gertrud Halbisch